ҚАУІПСІЗ ҮЙ – ҚИЫН ЖАҒДАЙДАҒЫ АЗАМАТТАРҒА ҚОЛДАУ МЕН ҚОРҒАУ

Сырдария ауданы Полиция бөлімі азаматтардың назарына тұрмыстық зорлық-зомбылықтың алдын алу, оның зардаптарын болдырмау және жәбірленушілерге жан-жақты көмек көрсету мақсатында маңызды ақпарат ұсынады.
Қазіргі таңда Қызылорда қаласында тұрмыстық зорлық-зомбылықтан зардап шеккен азаматтарға арналған арнаулы әлеуметтік қызметтер көрсету орталығы жұмыс істейді. Аталған орталық қиын өмірлік жағдайға тап болған азаматтарға уақытша баспана беріп қана қоймай, олардың қауіпсіздігін қамтамасыз етуге және қалыпты өмірге қайта оралуына жан-жақты қолдау көрсетеді.
Орталықта зорлық-зомбылық құрбандарына келесі бағыттар бойынша арнаулы әлеуметтік қызметтер ұсынылады:
✅ Әлеуметтік-тұрмыстық қызметтер – уақытша баспанамен қамтамасыз ету, тұрмыстық қажеттіліктерді ұйымдастыру;
✅ Әлеуметтік-құқықтық қызметтер – құқықтық кеңес беру, заңды құқықтар мен мүдделерді қорғауға жәрдемдесу;
✅ Әлеуметтік-медициналық қызметтер – медициналық көмек алу мәселелері бойынша қолдау көрсету;
✅ Әлеуметтік-психологиялық қызметтер – психологиялық кеңес беру, эмоционалдық күйзелісті жеңуге көмектесу;
✅ Әлеуметтік-педагогикалық қызметтер – балалар мен жасөспірімдерге тәрбиелік және білім беру бағытында қолдау көрсету;
✅ Әлеуметтік-мәдени қызметтер – қоғамға бейімделу мен әлеуметтік белсенділікті арттыруға бағытталған іс-шаралар ұйымдастыру;
✅ Әлеуметтік-экономикалық қызметтер – әлеуметтік төлемдер мен мемлекеттік қолдау шараларын алу бойынша көмек көрсету;
✅ Әлеуметтік-еңбек қызметтері – жұмысқа орналасуға, кәсіби бағдар алуға және еңбек дағдыларын дамытуға жәрдемдесу.
🏠 Ең бастысы – ҚАУІПСІЗ ҮЙ!
Тұрмыстық зорлық-зомбылық – бұл тек отбасының ішкі мәселесі емес, ол адам құқықтары мен бостандығына қол сұғатын құқық бұзушылық болып табылады. Сондықтан зорлық-зомбылыққа төзбеу, оның алдын алу және зардап шеккен азаматтарға дер кезінде көмек көрсету – қоғамның ортақ міндеті.
Егер Сіз немесе Сіздің жақындарыңыз тұрмыстық зорлық-зомбылықтың құрбаны болсаңыз, қауіпсіздікке қатер төнген жағдайда үнсіз қалмаңыз. Көмек сұрау – әлсіздік емес, өзіңізді және жақындарыңызды қорғауға жасалған маңызды қадам.
Көмек қажет болған жағдайда:
📞 102 – Полицияның жедел байланыс нөмірі
немесе
📞 Дағдарыс орталығының сенім телефоны: 8 (777) 340-87-34
Сіздің қауіпсіздігіңіз – біздің басты міндетіміз!